Натаму порталот пишува: – Крајно тенденциозно и несериозно е организирањето штрајк од страна на еден од Синдикатот на вработените во „Македонска пошта“ во услови кога за сите вработени платата е веќе обезбедена. Од тие причини веруваме дека штрајкот е политички мотивиран, а вработените се изманипулирани, со што се нарушува нормалното функционирање на претпријатието – велат од „Македонска пошта“.
Оттаму додаваат дека Синдикатот е навремено информиран, дека проблемот е решен и дека за сите вработени има обезбедено плата. – Но, со разочарување мораме да констатираме дека вработените се злоупотребени од одредени политички структури кои тенденциозно се обидуваат да го нарушат работењето на „Македонска пошта“ – информираат од претпријатието.
Оттаму посочуваат дека се во постојана комуникација и координација со Владата и со „заедничка соработка, во континуитет ги надминуваат сите проблеми што настануваат во тековното работење“.
– Залагајќи се за разрешување на сите настанати состојби, упатуваме апел до сите синдикални организации да се вклучат во решавањето на сите предизвици со кои се соочува претпријатието, без провокации и без манипулации. Уште еднаш потенцираме дека „Македонска пошта“ работи со полн капацитет, а во наредниот период ќе работиме на подигнување на ефикасноста на „Македонска пошта“ и услугите кон сите комитенти – потенцираат од „Македонска пошта“.