Продолжениот викенд завршува, но од попладнево започнаа гужвите на граничниот премин Евзони во соседна Грција.
Според сведоштва на граѓани социјалните мрежи хаосот почнал уште во 14 часот по грчко време повеќечасовни чекања се регистрираат на граничниот премин Евзони, каде што граѓаните чекаат околу три часа за излез од Грција и влез во Македонија.
Колоните возила се протегаат со километри, а причината за хаосот, покрај зголемениот број патници, е и примената на новиот европски систем за влез и излез – ЕЕС (Entry/Exit System), кој значително ги забавува граничните процедури.
Туристичката комора при Сојузот на стопански комори на Македонија (ССКМ) официјално упати барање до Министерството за туризам на Република Грција за привремено одложување на примената на новиот Влез/Излез систем-ЕЕС (Entry/Exit System -EES) на граничните премини за македонските државјани, во периодот од 1 јуни до 1 септември, 2026 година.
Иницијативата следеше по реакциите и укажувањата од туристичкиот сектор во земјава, кој предупредува дека евентуалната примена на системот во шпицот на летната туристичка сезона може да предизвика значителни застои на граничните премини, со чекања од повеќе часови. Ова, како што посочуваат туристичките работници, директно би влијаело врз квалитетот на туристичкото искуство, но и би можело да резултира со откажување на веќе резервирани аранжмани за летување во Грција.
Покрај Евзони/Богородица, на граничниот премин Дојран се чека околу еден час, а освен македонските, традционално бројни се и српските туристи.
Од Авто мото сојузот на Македонија информираат дека, за разлика од влезот, на граничните премини во моментов нема задржувања за излез од државата и сообраќајот се одвива непречено, без присуство на колони.