Утринава, по кратко боледување, на 75-годишна возраст почина македонската радиоводителска и DJ-ска легенда Драган Б. Костиќ.
Веста за неговата смрт ја потврдија членовите на семејството.
Во изминатите месеци, Драган Б. Костиќ водеше тешка здравствена битка, од која за жал не излезе како победник.
Тој помина илјадници часови и пет децении зад радиомикрофонот, забавувајќи, информирајќи и едуцирајќи ја својата многубројна публика — и продолжи да го прави тоа дури и во пензија.
Својата кариера ја започна во Македонското радио во 1970-тите години. Најпознат беше како водител на емисиите „Радио урнебес“, „Диско селектор“, „Заборави ако можеш“, „Кавервил“, „Чартфајл“, „Б.“ и многу други. Посебно место зафаќаше проектот „Сто приказни за сто песни“, чија приказна никогаш не беше целосно раскажана.
Драган Б. Костиќ остана еден од најголемите познавачи на светската музика, историјата на бендовите и пејачите, светските топ-листи и сопственик на една од најголемите колекции на плочи во земјата. Тој целиот свој живот го посвети на музиката и радиото, станувајќи вистински бард на македонското радиоводителство.
Кон крајот на 2024 година го одигра својот „Последен танц“ — проштален DJ-сет по половина век естрадна кариера.