Кавадарчанецот Сашко Гешовски е запаметен како првата македонска жртва од последната голема војна што започна на Балканот со распадот на поранешна СФРЈ.
Историјата на Македонија, за жал, бележи бројни случаи на Македонци кои животот го загубиле во војни во кои биле вмешани туѓи интереси, војувајќи како припадници на туѓи армии. Познати се и трагични примери кога браќа Македонци војувале еден против друг, под команда на различни, и често спротивставени, странски офицери.
Младиот Гешовски, на само 19 години, загина на 6 мај 1991 година во Сплит, Република Хрватска, додека служел во Југословенската народна армија (ЈНА). Сѐ уште не се разјаснети околностите под кои тој го загубил животот.
На денот на неговото загинување, Гешовски бил на стража во Командата на Военопоморската област во Сплит, во момент кога над 30.000 хрватски демонстранти протестирале против присуството на ЈНА, која, според нив, сѐ повеќе се користела како алатка на режимот на Слободан Милошевиќ.
Гешовски бил регрутиран во ЈНА на 17 септември 1990 година. Тој служел како припадник на воената полиција.
Тој беше првата жртва во конфликтот што предизвика распад на Југославија, потсетуваат од Музеј галеријата во Кавадарци. Бројни делегации денеска ќе му оддадат почит со положување на цвеќе.
„Роден е во Кавадарци на 31 октомври 1971 година, основно и средно училиште завршил во родниот град. По завршување на средното образование заминал на отслужување на воениот рок во ЈНА во Сплит – Р. Хрватска. На 6 мај 1991 година во него пукал маскиран припадник на МУП на Република Хрватска и смртно го погодил со 4 куршуми. Гешовски во критичниот момент бил на задача пред зградата на Воено поморската област во Сплит. Тој беше првата жртва во конфликтот што предизвика распад на Југославија во 1991 година“, споделуваат од Музејот.
Тогаш, на 7 мај таа далечна година, во Кавадарци се одржа протестен митинг на кого учествуваше речиси целото население од градот и околината, за да го искажат својот револт за смртта на својот сограѓанин, се палеа свеќи на градскиот плоштад во чест на Гешовски.
Неговото тело со воен хеликоптер беше пренесено во Кавадарци. На погребот присуствуваа повеќе од 20.000 граѓани, дојдени од сите краишта на поранешна Југославија. Во Кавадарци беше прогласена тридневна жалост, додадоа од Музеј галеријата.
Оттаму потсетија дека во воениот конфликт во 1991 година, покрај Гешовски, од Кавадарци загина и Петре Тодоровски, роден во 1971 година.
„Тодоровски загина како припадник на ЈНА на 26 јули 1991 година во касарната Љубљана – Поље, Р. Словенија. Својот млад живот го загуби како војник, додека бил на стража. Во овој конфликт загина и Мишко Митрев, роден во 1954 година во Ваташа. Митрев загина како подофицер во ЈНА во септември 1991 година, при одбрана на касарната во Ѓаково, споделија од Музејот, пренесува Либертас