Македонија

Премиерот е за отворање рудник за антимон кај Крива Паланка – „Штука“ и „Иловица“ предмет на судска постапка

Мицкоски истакна дека арбитражниот спор за „Казандол“ завршил во корист на македонската влада и дека украинската компанија, која била концесионер и ја покренала постапката, треба да ги плати трошоците поврзани со арбитражата.

Премиерот Христијан Мицкоски на собраниската седница за пратенички прашања ја поддржа идејата за отворање рудник за антимон во селото Луке, во Крива Паланка, тврдејќи дека поддршка за проектот дава и градоначалникот на општината од редовите на СДСМ.

  • За рудникот за антимон во Луке, во Крстов Дол, во паланечко, сум за. И вашиот градоначалник има ист став – рече Мицкоски, посочувајќи дека станува збор за еден од ретките градоначалници на СДСМ.

Според премиерот, локалниот градоначалник има поинаков став од актуелното партиско раководство и од пратеникот на кој му одговарал.

  • Тој застана во насока на поддршка на тој рудник за антимон. Поконкретно од ова не можам да ви одговорам – изјави Мицкоски.

Осврнувајќи се на случајот „Казандол“, премиерот рече дека арбитражната постапка произлегла од политиките на претходната влада, која го раскинала договорот за проектот. Тој тврдеше дека во постапката, која актуелната влада ја наследила, имало сведочења според кои претходната власт била подготвена да постигне спогодба и да исплати одредена сума за да го изгуби спорот.

  • Се спомнуваа цифри од 20 до 30 милиони долари, а потоа, нормално, поединци да добијат одредена награда. Но, не знам дали тоа е вистина – рече Мицкоски, нагласувајќи дека станува збор за тврдења изнесени во рамките на сведочењата, а не за нешто што тој го потврдува како факт.

Мицкоски истакна дека арбитражниот спор за „Казандол“ завршил во корист на македонската влада и дека украинската компанија, која била концесионер и ја покренала постапката, треба да ги плати трошоците поврзани со арбитражата.

  • Како заврши процесот? Со победа на македонската влада. Дури и странката во спорот, украинската компанија, треба да ги плати трошоците за арбитражата. Државата ќе плати нула – рече премиерот. Тој оцени дека исходот е резултат на, како што рече, домаќинско и одговорно работење на актуелната влада во интерес на граѓаните.

Во однос на проектот „Иловица – Штука“, Мицкоски рече дека неговите почетоци датираат од времето на владата предводена од Владо Бучковски, кој бил предлог на СДСМ. Потоа, како што наведе, во периодот на владата на СДСМ и ДУИ, Министерството за економија донело одлука за спојување на двете концесиски подрачја во областа меѓу Штука и Иловица. Премиерот ја обвини тогашната власт дека нејзини членови подоцна се оградувале од одлуката, иако, според него, присуствувале на владината седница и гласале за неа, за што, како што рече, постојат стенограми. Тој додаде дека само една недела подоцна била донесена нова одлука со која се поништувало претходното спојување на концесиските подрачја.

Според Мицкоски, концесионерите потоа повеле судска постапка, а актуелната влада добила одлука од Вишиот управен суд со која се поништува второто решение, односно одлуката за поништување на првичното спојување, со што повторно стапила во сила одлуката за спојување на концесиските подрачја.

  • За да се спојат тие подрачја, потребен е анекс на договорот, а анексот на договорот не е регулиран со законот – рече премиерот.

Тој не најави конкретен следен чекор во врска со проектот, но ја поврза темата со ставот на Владата дека нема да презема дејствија спротивни на интересите на граѓаните.

  • Оваа влада, запомнете, никогаш нема да направи ништо што е спротивно на интересите на граѓаните. Јас не ја распродавам државата, туку само го враќам она што вие го распродадовте – рече Мицкоски, обвинувајќи ја претходната власт за одлуки што, според него, биле на штета на државните интереси.

Како примери ги наведе прашањата поврзани со името на државата, територијата и, како што рече, плантажите со марихуана, француските предлози и откажувањето од „македонскиот род“.

  • Тоа јас го враќам – заклучи премиерот на собраниската седница за пратенички прашања.

Најнови вести од: Македонија

Аларм: Секое 10-то дете во Македонија изложено на сексуална злоупотреба на интернет

Секое десетто дете во Македонија на возраст од 12 до 17 години коешто користело интернет било изложено на сексуална експлоатација и злоупотреба. Станува збор за околу 12.000 деца, бројка што ја потврдува и последното истражување на УНИЦЕФ.

(Видео): Проблемот со кравите во Крива Паланка стигна до Обвинителството – Општината поднесе кривични пријави

Крива Паланка, заедно со жителите од засегнатите села, поднесоа неколку кривични пријави до Обвинителството поради институционално непостапување по извршни решенија за одземање на добитокот што слободно шета во градот и пошироко.

УКИМ не платил сметки за струја, ако не се плати долгот – факултетите ќе останат во мрак

Дел од државните факултети и Ректоратот од утринава се во мрак поради неплатени сметки за електрична енергија. Ова за Телма го потврдија и од ЕВН. Без струја останаа Машинскиот, Електротехничкиот, Природно – математичкиот, земјоделскиот факултет, но и зградата на Ректоратот.

Велковски: Во владина постапка се измените на Законот за детска заштита, од 2027 поголема поддршка за децата со посебни потреби

Измените на Законот за детска заштита веќе се во владина процедура, каде се предвидува зголемување на постоечките државни износи за поддршка, со посебен фокус на децата со посебни потреби, изјави министерот за труд и социјална политика и млади, Ѓоко Велковски одговарајќи на пратенички прашања во Собранието, нагласувајќи дека се очекува овие измени брзо да ја поминат собраниската процедура и од 1 јануари 2027 година децата од оваа категорија да добијат зголемени средства.

Николоски: Од 1 јануари 2027 државата ќе биде единствен организатор на интернет-игрите на среќа и ВЛТ терминалите

Владата останува на ставот за ограничување на игрите на среќа и веќе презеде конкретни законски мерки со кои се намалуваат можностите за нивно организирање, истакна заменик претседателот на Владата и министер за транспорт, Александар Николоски, одговарајќи на пратеничко прашање на Јована Мојсоска од Левица поврзано со работењето на Државна лотарија, односно дали Владата ќе иницира разрешување на директорот на Државна лотарија, Александар Климовски, како и дали ќе биде затворена платформата за онлајн коцкање „Мегавин“.

(Фото): Вештачката интелегенција е придобивка што мора да ја искористиме, рече Николоски

Во делот на дигитализација во секторот транспорт, Николоски истакна дека се работи на ИТС-системот во патниот дел, а веќе се разгледуваат опции и за употреба во железничкиот сообраќај.

To top