Просечната оценка од полагањето матура во јунската испитна сесија изнесува 3,66, пресметано за сите три типа матура: државна матура, државна стручна матура и државна уметничка матура, кои првпат беа воведени оваа година. Два месеца по полагањето на првиот од двата екстерни испити, министерката за образование и наука, Весна Јаневска, и директорката на Државниот испитен центар, Даниела Јовчевска-Михајловска, на прес-конференција ги соопштија конечните резултати, по поднесените и разгледани приговори. Повеќе од 14.500 ученици кои завршија средно образование во учебната 2025/2026 година беа пријавени за полагање на екстерните испити во јунската сесија. Учениците полагаа задолжителен испит по мајчин јазик и уште еден изборен предмет. Тестирањето се одржа на 6, 11 и 12 јуни.
Просечната оценка за државна матура е 3,62, за државна стручна матура е 3,91, а за државна уметничка матура е 3,59. Јаневска и Јовчевска-Михајловска изразија задоволство од резултатите и посочија дека е задржан континуитетот од минатата година, кога просечната оценка беше 3,69. Во 2024 година, просекот изнесуваше 3,26.
Министерката нагласи дека годинава првпат се полагало според нова концепција, која предвидува три типа матура. Според неа, на тој начин учениците биле тестирани според материјалот што реално го изучувале во текот на четиригодишното средно образование.
- „Задоволна сум што две години по ред се одржува речиси идентичен просек, за разлика од 2024 година, кога изнесуваше 3,26“, рече Јаневска, честитајќи им на учениците што ја положиле матурата и стекнале услов за запишување на факултет или за директен влез на пазарот на труд.
Од вкупно 14.587 ученици пријавени за полагање матура, 12.184 биле пријавени за државна матура, 2.276 за државна стручна матура, а 127 за државна уметничка матура. Забележан е подобар успех по мајчините јазици во сите три типа матура, како и по математика и по другите странски јазици, меѓу кои германски, француски, италијански и руски. Кај овие предмети просекот е над 4,00.
Јаневска посочи дека годинава немало масовно препишување како пред две години. Сепак, на 226 ученици им бил поништен тестот и тие ќе треба повторно да полагаат во август. Дел од учениците биле фатени како препишуваат за време на испитот, а кај дел било утврдено дека препишувале по прегледувањето на тестовите. Директорката на Државниот испитен центар рече дека од полагањето биле отстранети ученици кои препишувале или користеле електронски уреди. Поништени биле и тестови кај кои при оценувањето, особено кај есеите, биле забележани идентични текстови.
По објавувањето на резултатите биле поднесени 805 приговори, што претставува 2,86 проценти од вкупниот број матуранти што полагале. Учениците на кои им бил поништен тестот, заедно со оние што отсуствувале во јуни, ќе може да полагаат во августовската испитна сесија.