Аналитичарот и поранешен функционер во СДСМ, Ивор Мицковски, не може да му се изначуди на лидерот на неговата поранешна партија Венко Филипче дека не чул(е) оти Бугарија го негира македонскиот идентитет.
„Прочитајте го убаво овој одличен текст и прочитајте му на Филипче, за да разберете со што се соочува Македонија со Бугарија и дека уставните измени не се единствениот услов. Венко Филипче изјави: ‘Не сме чуле никаде од Бугарија дека го негира нашиот идентитет’. Тоа би било помалку зачудувачко кога бугарските позиции навистина би биле нејасни, имплицитни или дипломатски прикриени. Но, тие со години се експлицитно формулирани во официјални државни документи, парламентарни декларации и позиции формално доставени до Европската Унија. Не станува збор за изјави кои треба да се толкуваат, да се бараат меѓу редови или да се извлекуваат од дипломатски разговори. Тие се јавно достапни, писмено фиксирани и институционално обврзувачки. Оттука, просто е неверојатно да се тврди дека нешто не е кажано кога тоа со години континуирано се повторува на најформален можен начин“, констатира Мицковски во објавата на Фејсбук.