Во угостителските објекти ќе мора да има јасна физичка поделба меѓу пушачите и непушачите, а во некои случаи и посебен влез, предвидува новиот закон за заштита од пушење кој наскоро ќе се најде пред Владата.
Министерот за здравство Азир Алиу вели дека по бројни реакции од угостителите и тутунската индустрија, направени се дополнителни анализи и разговори, по што решенијата се прилагодени.
„Сите отворени прашања се затворени. Очекувам законот брзо да помине и нашата земја да биде препознаена и на европско ниво “, изјави министерот Алиу на денешната прес-конференција.
Една од клучните новини е што терасите ќе можат да функционираат како дел за пушење и со две отворени страни, наместо претходно предложените три.
Најголемата обврска за сопствениците на локали ќе биде да обезбедат одвоен влез за делот каде што не се пуши, со цел да се заштитат граѓаните кои не консумираат цигари.
„Целта е секој непушач да може да влезе во објект без да биде изложен на чад, а пушачите да имаат јасно определен простор“, вели министерот.
Властите очекуваат со новите мерки во наредните години значително да се намали бројот на пушачи во земјава.