Министерството за здравство соопшти дека е воведен нов електронски модул за донации, кој обезбедува транспарентен увид во сите донации што ги примиле Министерството и јавните здравствени установи.
Овој модул е достапен на веб-страницата donacii.zdravstvo.gov.mk и нуди детален преглед на секоја донација, вклучувајќи информации за донаторот, вредноста на донацијата, како и податоци за видот на донираното, како медицински материјали, апарати и слично. Според статистичките податоци, 85% од досегашните донации се состојат од медицински материјали, вклучително лекови, вакцини, апарати за одредени јавни здравствени установи и други потреби.
– Од самиот модул се гледа дека донациите доаѓаат од широк спектар донатори – од меѓународни институции и организации, држави и хуманитарни фондации. Токму нивната поддршка е клучна потврда за довербата и значењето што го има нашиот здравствен систем. Досега во модулот се евидентирани над 400 донации, процесот на регистрирање се уште е во тек и оваа бројка ќе биде уште поголема, што зборува за тоа дека расте довербата на меѓународните партнери и пријателски држави во нашиот здравствен систем, изјави министерот за здравство, Азир Алиу, се вели во соопштението од МЗ.
Целта е да обезбедиме координација и одобрување на донациите, а воедно да се избегнат ситуации кога пристигнува апаратура со различни оперативни системи или опрема за која нема достапни резервни делови и сервис во нашата земја.
– Со овој модул, испраќаме јасна порака дека во здравството нема скриени процеси и тајни договори, дека секоја донација е видлива, секоја помош е евидентирана, а секој граѓанин има право на информација, заклучи министерот Алиу, информираат од МЗ.