Туристот од Македонија што тешко се повреди на тобоган во турското летувалиште Кушадаси минатиот месец денеска е транспортиран со владиниот авион во Скопје и сместен на Универзитетската клиника за трауматологија, ортопедски болести, анестезија, реанимација и интензивно лекување (ТОАРИЛУЦ), информира директорот Игор Мерџановски.
На 23 јули на пациентот му била извршена хируршка интервенција во болница во Кушадаси, каде што бил на лекување до денеска, кога на барање на турските лекари бил организиран воздушен медицински транспорт со владиниот авион, а повредениот го придружувал медицински тим предводен од раководителката на КАРИЛ, д-р Марта Тренева.
„Пациентот е во здравствена состојба што бара интензивно лекување. Ја разгледавме медицинската документација и можам да кажам дека операцијата извршена во Турција е задоволителна и добро направена. Повредите на `рбетниот мозок се меѓу најсериозните повреди“, истакна Мерџановски, најавувајќи дополнителни испитувања и понатамошна рехабилитација, како и физикална терапија во спиналниот центар во државава.