Владината портпаролка Марија Митева реагираше на обвинувањата што денеска од собраниска говорница ги изнесе координаторот на пратеничката група на СДСМ, Оливер Спасовски, кои се однесуваат на решение што Прекршочната комисија при Агенцијата за заштита на правото на слободен пристап до информации од јавен карактер го донела за запирање на прекршочна постапка во корист на Митева, во време кога таа беше портпаролка на ВМРО-ДПМНЕ. Митева обвини дека опозицијата прави политички конструкции насочени кон нејзина политичка дискредитација и го повика Спасовски да излезе од комоцијата на говорење од собраниска говорница и истите ставови да ги каже надвор од Собранието, приложувајќи докази за обвинувањата.
- „Знам дека собраниската говорница носи комоција и немање одговорност за изнесени ставови и ти дава комфор да искажуваш тешки квалификации, но би било храбро да го повториш тоа што го кажа денес надвор од таа говорница, со таков скандалозен наслов како што сте го објавиле на јутјуб-каналот на СДС. Повтори дека некој фалсификувал документи за да ме спаси. Или дека имало намера, насока или било каква интервенција од мене некој да направи нешто спротивно на закон за да ме ‘спаси’. Кажи го тоа директно. Со име и презиме. И со доказ. Твојата конструкција е очигледна и сакаш политичка приказна, а моето име го ставаш во неа само за да ме дискредитираш“, пишува Митева во реакцијата објавена на Фејсбук.
Таа негира дека некогаш побарала од некого да интервенира во нејзина корист за да ја „спаси“. Во својата реакција, Митева обвини дека ваквите политички контрукции не се новост за СДСМ и дека додека била на власт, партијата ги користела како средство за пресметка со политичките противници.
- „И кога веќе толку лесно зборуваш за ‘фалсификување’, редно е да се потсетиме и на времето кога беше министер за внатрешни работи и кога се откри скандалот со група полициски службеници вмешани во издавање 214 пасоши на странски државјани под туѓ идентитет, меѓу кои, имаше и лица поврзани со меѓународни криминални групи. Затоа, Спасовски, помалку конструкции од говорница со моето име во нив“, пишува владината портпаролка на Фејсбук.
Координаторот на пратеничката група на СДСМ, Оливер Спасовски, денеска од собраниска говорница обвини дека Марија Митева, во периодот кога ја извршувала функцијата портпаролка на ВМРО-ДПМНЕ, направила прекршок со тоа што не подготвила и не доставила соодветен извештај до Агенцијата за заштита на правото на слободен пристап до информации од јавен карактер. Наместо да биде санкционирана, според наводите на Спасовски, Прекршочната комисија на Агенцијата, предводена од сегашниот директор Петар Гајдов, донела решение со кое ја запрела постапката против неа со образложение дека нема услови за изрекување на прекршочна санкција, што според СДСМ, претставува манипулација за Митева да се спаси од одговорност.