„Тоа е категорично стратешка одлука, бидејќи допира една од најчувствителните теми во добрососедските односи со Северна Македонија“, вели бугарскиот историчар Тодор Чобанов за „враќањето“ на наводните останки на Цар Самоил од Грција во Бугарија врз основа на меѓудржавниот договор за размена на историски артефакти, мошти и реликвии.
„Исто како што Грците успеаја да се справат со обидите за присвојување на Александар Македонски, така и ние мораме категорично, еднаш засекогаш, да им ставиме крај на шпекулациите со историјата на Самуил и неговите напори да го зачува бугарското царство“, додаде тој во интервју за тамошната телевизија Нова.
Заменик-министерот за култура од 2009 до 2011 година во тогашната влада на Бојко Борисов објаснува дека имаат Договор за пријателство, добрососедство и соработка со Македонија, но Мешовитата комисија за историски и образовни прашања не функционирала „не по вина на Бугарија“. Покрај тоа, со децении имало упорни обиди за искривоколчување и за ретроактивна редактура на „заедничката историја“, иако „таа одамна е проучена и утврдена во светската наука“.
„Располагам со скенирани учебници од тамошните гимназии, кадешто пишува дека Самоил е ослободител на македонските Словени од бугарските поробувачи“, рече Чобанов.