Со 33 нови полициски мотоцикли и исто толку комплети мотоциклистичка опрема се зајакнуваат капацитетите на сообраќајната полиција. Опремата е обезбедена од Републичкиот совет за безбедност на сообраќајот на патиштата (РСБСП) и денеска официјално ѝ беше предадена на Министерството за внатрешни работи.
На примопредавањето присуствуваа министерот за внатрешни работи Панче Тошковски и претседателот на РСБСП Горан Ангеловски. Станува збор за мотоцикли „Piaggio Beverly 310 HPE“ во полициска изведба, придружени со заштитни кациги, јакни, панталони, чизми, како и летни и зимски ракавици.
Вкупната вредност на набавката изнесува 16.845.561 денари. Според надлежните, новата опрема ќе обезбеди поголема мобилност, поефикасно регулирање и контрола на сообраќајот, како и подобри услови за работа на полициските службеници.
Тошковски оцени дека набавката претставува конкретен резултат на соработката меѓу МВР и РСБСП, со заедничка цел – унапредување на безбедноста во сообраќајот и намалување на бројот на сообраќајни незгоди и жртви.
„Денеска не зборуваме само за 33 нови мотоцикли и опрема, туку за дополнително зајакнување на капацитетите на сообраќајната полиција и за уште еден чекор кон побезбедни патишта. Ова е пример како треба да функционира меѓуинституционалната соработка – со конкретни проекти и резултати што граѓаните ќе ги почувствуваат“, истакна Тошковски.
Тој нагласи дека модернизацијата на сообраќајната полиција е дел од поширокиот пристап на МВР за унапредување на сообраќајната безбедност, во кој значајна улога има и системот „Безбеден град“.
Според Тошковски, резултатите од системот во намалувањето на бројот на сообраќајни незгоди, повредени и загинати лица се дополнителен мотив за продолжување на активностите. Тој порача дека зад секоја статистика стои човечки живот и дека целта на сите мерки е да се спасат што повеќе животи.
Претседателот на РСБСП Горан Ангеловски посочи дека Советот и оваа година издвојува средства за модернизација и опремување на организациските единици на МВР задолжени за контрола и регулирање на сообраќајот.
Тој оцени дека набавката на мотоциклите и комплетната опрема значително ги зајакнува капацитетите за сообраќајна контрола и претставува уште еден пример за успешна меѓуинституционална соработка.
Тошковски и Ангеловски ја потврдија определбата за продолжување на соработката преку нови инвестиции, превентивни активности и проекти насочени кон подигнување на сообраќајната култура.
Крајната цел е намалување на бројот на сообраќајни незгоди, повредени и загинати лица и создавање побезбедни услови за сите учесници во сообраќајот.