Вицепремиерот Николоски истакна дека Агенцијата за просторно планирање има централна улога во обликување на идниот развој на државата. „„Би сакал да ја нагласам важноста на новиот просторен план од следните причини: Македонија како природна крстосница меѓу Југоисточна и Централна Европа има геостратегиска важност, која произлегува од положбата на коридорите Исток–Запад и Север–Југ, односноа Коридорите 8, 10 и 10 – д. Тука е и близината на јужните пристаништа и улогата како транзитна земја за транспорт, енергија и трговија.“ – рече Николоски.
Тој посочи дека е важно Македонија енергетски да се поврзува. Во овие рамки изградбата на интерконекторот, кој нѐ поврзува со Грција, и планираниот интерконектор со Србија, ќе значи дека Македонија ќе стане и енергетска крстосница.
Засилено се работи на далноводно поврзување и со Албанија преку далноводот Охрид-Елбасан. „Тука се автопатите, железничките поврзувања, логистичките центри, мултимодуларните јазли, особено јазолот со вкрстувањето на коридорот 10 со коридорот 8, подобрување на меѓуграничната поврзаност и др. Затоа треба да постои добра соработка со сите институции на изработка на тој документ, со кој ќе се следи развојот на државата.” – напомна Николоски.
Тој укажа на институционалното партнерство со Министерството за транспорт во спроведувањето на стратегиските политики на Владата. Најави дека тоа министерството работи на изработка на софтвер за развој и управување со геопросторни податоци.