Ќе има повеќе пари за плати, пензии, инфраструктурни проекти, субвенции, здравство. Владата го донесе ребалансот на буџетот на годинава. За минимален 1% се зголемуваат приходите и расходите на државната каса. Вкупните расходи ќе изнесуваат 6,56 милијарди евра, а вкупните приходи 5,92 милијарди евра. Буџетскиот дефицит ќе остане на истото ниво од 4% од БДП или 672 милиони евра. Владата очекува да собере речиси 57 милиони евра повеќе од неданочни приходи, административни такси, концесии, добивка од Народната банка и други неданочни приходи, како и проширување на самофинансирачките активности на институциите.
Од друга страна, капиталните инвестиции се зголемуваат за 4,8 милиони евра и ќе изнесуваат 772 милиони.евра. Најголемо кратење има кај Владата, а повеќе пари ќе добие Министерството за одбрана кај кое има добра реализација на капиталните расходи.
Се зголемуваат и парите за исплата на плати на администрацијата. Овој пораст најмногу се должи на повисоките плати за 10% во Министеството за внатрешни работи. Исто така, предвидени се и повеќе пари за пензионерите. Трансферите од централниот буџет до Пензискиот фонд ќе достигнат 813 милиони евра. Во септември ќе има ново покачување на пензиите, но се уште не се знае колкаво ќе биде тоа.
Вкупните приходи со ребалансот се проектирани на ниво од 362,4 милијарди денари или за околу 1 % повеќе во однос на Буџетот, односно за околу 3,5 милијарди денари. Вкупните расходи се планирани на ниво од 403,7 милијарди денари и исто така бележат раст од околу 1%, односно за околу 3,5 милијарди денари, што се должи пред се на развојната компоненета.
- Со предложените измeни, или ребаланс вршиме реалокација на средства помеѓу буџетските корисници, дообезбедуваме средства за непречена исплата на плати пред се во Министерството за внатрешни работи, каде обезбедивме раст на платите на вработените од 10%. Исто така, се обезбедени дополнителни средства за исплата на зголемените пензии и транзициски трошоци и најважно е обезбедувањето дополнителни околу 300 милиони денари за капитални расходи, потенцира министерката за финансии.
Таа појасни дека капиталните расходи се планирани во висина од 47,5 милијарди денари и се во насока на додавање средства за динамизирање на реализацијата на проектите кај коишто е веќе потврдена добра реализација, пред се во Министерството за одбрана. Исто така, посочи, дека продолжува финансиската поддршка и соработка на Владата со општините, за кои претходно со донесената Прераспределба беа обезбедени дополнителни 600 милиони денари.