Од владејачката ВМРО-ДПМНЕ преку соопштение соопштија дека економските политики на Владата даваат резултати и дека животниот стандард на граѓаните бележи континуирано подобрување.
Според партијата, македонската економија остварува стабилен раст веќе седум квартали по ред, со раст на бруто-домашниот производ од 3%, што претставува показател дека земјата се движи во позитивна насока.
Од ВМРО-ДПМНЕ наведуваат дека резултатите од владините политики се видливи преку зголемувањето на платите во повеќе сектори, меѓу кои образованието, здравството, полицијата и одбраната.
„Просечната нето-плата пораснала од 40.496 денари на 48.433 денари за само две години, што претставува зголемување од 19,6 проценти. Дури и кога ќе се земе предвид растот на цените, реалната куповна моќ на граѓаните е значително зголемена, односно платите растат побрзо од инфлацијата“, се наведува во партиското соопштение.
Од партијата посочуваат дека позитивните економски показатели не се ограничени само на одредени области, туку дека раст е забележан и во секторите информации и комуникации, транспорт, рударство, недвижности и други дејности.
Според ВМРО-ДПМНЕ, стабилизирањето на инфлацијата, растот на економијата и зголемувањето на платите се потврда дека економските политики даваат резултати, при што најавуваат продолжување на мерките за постигнување уште подобри економски показатели во иднина.