Во денешната расправа за прекин на мониторингот за Бугарија од Парламентарното Собрание Советот на Европа се обрати и пратеничката на ВМРО-ДПМНЕ Марија Петрушевска кој укажа на причините зошто ПАЦЕ треба внимателно да ги следи состојбите со човековите и малцинските права во оваа земја каде Македонците се уште се под силна дискриминација од државните институции.
Во дебатата преходно беше истакнато дека иоколу 90 пресуди на Судот за човекови права во Стразбур се уште не се имплементирани од Софија а една третина се постари од 10 години.
Петрушевска на почетокот се заблагодари на известувачите за овој важен извештај од кој се гледа дека Бугарија продолжува да одбива да ги спроведе пресудите на Европскиот суд за човекови права.
,,Како што е нагласено во Извештајот, остануваат сериозни загрижености во врска со човековите права, вклучително и оние на етничките Македонци. Македонците не се вклучени во програмите за малцинствата, тие не добиваат никаква помош и немаат претставници во консултативните тела. Нивниот јазик, литература и историја не се изучуваат и им е спречено да основаат организации за да ги бранат своите права. Да ве потсетам дека признавањето како „национално малцинство“ од Бугарија не е предуслов за заштита според Рамковната конвенција за заштита на националните малцинства.
Главната грижа во овој поглед останува неизвршувањето на пресудите на Европскиот суд за човекови права, особено во случаите УМО Илинден и други против Бугарија. Бугарија веќе 18 години одбива да го регистрира ова здружение”, рече Петрушевска која посочи дека македонското малцинство во Бугарија и неговите организации се симбол на храброста и на демократската борба за нивните најосновни човекови права.
,,Почитувани колеги, постои македонски роман „Пиреј“ од Петре М. Адреевски:
Ама ти колку сакаш кошкај ја, корни ја, куби ја, таа пак не умира. Само малку да се допре до земјата и пак ќе се фати, ќе оживи, ќе потера. Ништо не ја ништи таа трева.
Цврсто верувам дека, без разлика на однесувањето на бугарските власти, македонското малцинство секогаш ќе се преродува, секогаш ќе се крева и секогаш ќе опстојува”, порача Петрушевска во Стразбур.
Петрушевска својата реакција ја објави во дебатата во која се зборуваше дали Бугарија заслужува по 25 години да не биде под мониторинг на своите механизми за човекови права и владеење на правото.
Повеќе на овој ЛИНК