Пред Велигден, Агенцијата за храна уништи 40 тони јајца кои биле увезени во земјата од Србија, но кои требало да бидат пласирани на пазарот на Северна Македонија како „јајца од македонско потекло“.
Во едната пратка биле пронајдени 270 илјади, додека во другата 302.400 необележани јајца, за кои се претпоставувало дека биле дополнително обележани и погрешно поставени како македонски, со што се загрозила конкурентноста на домашното производство.
Необележаните јајца од Србија беа запленети во соработка со Царинската управа како дел од засилените контроли на увозот на јајца пред Велигден.
„За стореното кривично дело, операторот со храна, кој е регистриран во АХВ, е казнет со 1.400 евра, додека небезбедните, необележани јајца се безбедно уништени во депонијата Дрисла.
Во однос на овој оператор со храна, како и за другите увозници на јајца, на сила се мерки за зголемена фреквенција на инспекциски контроли врз увозот и домашното производство на јајца“, изјавија од АХВ за „Слободен печат“.
На прашањето дали имале некаков притисок или влијание во врска со овој настан, тие рекоа дека не работат и не се подложени на никакво влијание во својата работа и не регистрираат никаков притисок или влијание за настанот.
„Операторот со храна, кој има и сопствено производство на јајца, е активен на пазарот и против него не се поднесени кривични пријави“, нагласија од АХВ.
Агенцијата додава дека досега ова е единствениот небезбеден увоз од овој оператор за кој АХВ била свесна и во врска со кој реагирала навремено и спречила пласирање на небезбедни јајца на домашниот пазар.