Николај Овчаров, археолог и траколог од Бугарија, се истакна со празнично послание во бугарскиот весник „Труд“ на Денот на сесловенските просветители Кирил и Методиј, во кое застана во одбрана на министерката Велислава Петрова-Чамова и нејзиниот израз „северномакедонски партнери“ за „братјата“ од Македонија.
„Бугарскиот министер за надворешни работи несомнено е во право, бидејќи го дефинира населението само во еден дел од територијалната единица Македонија. Бидејќи надвор од Вардарска Македонија, која во суштина е денешна РСМ, постои и Егејска Македонија, која е во границите на Република Грција, и Пиринска Македонија, која денес е во Татковината – Република Бугарија. Чудно ми е што Грците сè уште не реагирале на најновите провокации од страна на РСМ“, пишува во подолг напис преполн со „историски“ факти и навреди кон југозападниот сосед на Бугарија „експертот“ за кој на Фејсбук постои група „СПРЕТЕ Николай Овчаров! / STOP Nikolay Ovcharov!“, во чиј опис пишува „Оваа група е посветена на чистење на археологијата во Бугарија од корупција, криминал и псевдонаука“.