„Културата на Првото бугарско царство е сложена мешавина – гледаме шамански култови и ирански традиции. Нашата историја не е едноставна – и не треба да ја поедноставуваме. Бугарите имаат сложена историја која не треба да ја омаловажуваме, туку да ја истражуваме. Десетици народи учествуваат во нашата етногенеза – не само Словени, Тракијци и Прабугари“, изјави тој за впечатоците од неодамнешната експедиција на бугарски археолози во Монголија, која ја потврдила хипотезата дека корените на Прабугарите се од Алтајскиот регион.
„Бугарија е благословена со тоа што е создадена на само околу 200 км од Цариград – центарот на цивилизацијата во тоа време. Но, од друга страна, сите инвазии минуваат тука. Ова нè прави нешто како чувари на Европа – ние сме должни да ги спречиме“, додаде Овчаров пред да се осврне на својата омилена тема Македонија.
„Оној што не го познава минатото, не може да ја разбере иднината. Македонското прашање нема да се реши со железница до Скопјe, туку со длабоко разбирање на историјата“, нагласи тој, пофалувајќи ја бугарската дипломатија за нејзината цврста позиција по ова прашање.
Тој ја спореди позицијата на Бугарија со онаа на Грција за време на Преспанскиот договор и инсистира неговата земја да не отстапува од своите принципи.