Припадници на Министерството за внатрешни работи на Србија ги уапсија А. С. (1989), Е. В. (1984), Е. Г. (1978) и А. Ц. (2005), сите четворица државјани на Албанија, поради сомнение дека сториле кривично дело „поттикнување национална, расна и верска омраза и нетрпеливост“ со провоцирање на годишнината од бомбардирањето од НАТО.
А. С. денеска јавно објавил видео на својот Фејсбук профил од кое се гледа како во автомобил „Ауди“ во друштво на другите осомничени лица вози по автопат низ Србија, на непримерен начин прикажувајќи ги симболите на „Голема Албанија“, како и вербално споменувајќи ја Република Србија во негативен контекст, користејќи несоодветни зборови, објаснуваат од српското МВР.
На осомничените им е одреден притвор до 48 часа, по што со кривична пријава ќе бидат изведени пред Вишото јавно обвинителство во Белград, Специјално одделение за борба против високотехнолошки криминал.
На 24 март 1999 година во 19:53 часот Северноатлантската алијанса ја почна „хуманитарната интервенција“ против тогашна СР Југославија.
Според српското Министерство за одбрана, за време на „агресијата на НАТО“ загинале 1.031 припадник на војската и на полицијата, а ранети се 5.173 војници и полицајци.
Убиени се околу 2.500 цивили, меѓу кои 89 деца, ранети се околу 6.000 цивили, меѓу кои 2.700 деца, а 25 лица се водат како исчезнати.
Настаните во Рачак на 15 јануари 1999 година и неуспехот на преговорите во Рамбује и во Париз потоа беа наведени како главна причина за нападите што траеја до 10 јуни 1999 година.