Претседателот на Република Српска, Милорад Додик, се огласи по одлуката на Централната изборна комисија на Босна и Херцеговина (ЦИК БиХ) да му се одземе мандатот.
„Уште едно с..ње од Сараево. Последното“, напиша Додик на „Х„ по одлуката.
ЦИК БиХ ја донесе оваа одлука едногласно.
Одбраната на Додик има право да поднесе жалба против оваа одлука до Апелациониот оддел на Судот на БиХ, кој ги разгледува жалбите за изборите. По истекот на жалбениот процес, одлуката ќе стане конечна.
Седницата на ЦИК со оваа точка на дневен ред се одржа откако Милорад Додик беше осуден на една година затвор со правосилна пресуда.
Конечната пресуда на Судот на БиХ објавена на 1 август, исто така, му забрани на Додик политичка активност во период од шест години.
Во пракса, ова значи дека тој не може да биде кандидат на избори за која било функција, ниту може да биде назначен на која било позиција во органите на извршната, законодавната или судската власт, или во која било институција чија работа е целосно или делумно финансирана од јавни средства.
Додик од 2010 година трипати ја извршуваше функцијата претседател на РС, со исклучок на периодот од 2018 до 2022 година кога беше член на Претседателството на БиХ.