Основното јавно обвинителство Скопје кое поднесе обвинение против него и уште седум лица за случајот „Државна лотарија“ екс премиерот го гони за дело за кое може да добие максимална казна од 10 години затвор.
Сите осомничени се гонат како соизвршители (согласно член 22 соизвршителство) за кривичното дело „Злоупотреба на службената положба и овластување“ по член 353 став 5, во врска со став 4 и став 1 од Кривичниот законик.
По низата правни превирања и измени во Кривичниот законик во изминатите години, законската рамка дава можност за казна од 48 месеци до 120 месеци затвор.
Распон на казната за кривичното дело од член 353 став 5, кое се однесува на злоупотреби при јавни набавки или кога е нанесена штета на средствата од Буџетот во големи размери е најмалку 4 години. Максималната пропишана казна сега изнесува 10 години затвор.
Според пријавата има јасна поврзаност на ставовите 1, 4 и 5 од членот 353 и членот 22.
Ставот 1 од членот 353 го дефинира основниот облик на делото каде службеното лице ја искористува својата положба за да прибави корист или да нанесе штета.
Ставовите 4 и 5 од истиот член го квалификуваат делото како потешко поради причинување на имотна штета или лична корист во големи размери поврзани со буџетски средства и јавни набавки.
Од друга страна член 22 од Кривичниот законик го уредува соизвршителството, што значи дека сите вклучени лица кои заеднички учествувале во извршувањето на делото се соочуваат со истата казнената рамка предвидена за тоа дело.