Државните службеници во Грција денеска излегуваат на 24-часовен штрајк, повикан од Синдикалната федерација на државните службеници (АДЕДИ), во знак на протест против новиот нацрт-закон за труд кој предвидува воведување на 13-часовен работен ден и други контроверзни измени, јави весникот „Катимерини“.
Минатата недела АДЕДИ објави повик за штрајк со клучни барања: враќање на 13-ата и 14-ата плата, значително зголемување на платите, потпишување на колективни договори во јавниот сектор, обезбедување на стабилна и постојана вработеност, како и укинување на новиот дисциплински закон.
Вработените во градскиот превоз во Атина се приклучуваат на акцијата на почетокот и крајот од работниот ден, со цел да ја поддржат солидарноста со државните службеници. Поради тоа, метрото и трамвајот во престолнината ќе работат од 9:00 до 17:00 часот, додека автобусите и тролејбусите од 9:00 до 21:00 часот.
Железничките работници исто така се приклучија на штрајкот, што значи дека денеска нема да сообраќаат возови низ цела Грција, пренесува „Катимерини“.
Главниот протестен марш е закажан за 11:00 часот на централниот плоштад Синтагма во Атина.
Ова не е првпат синдикатите да реагираат: на 1 октомври се одржа 24-часовен национален штрајк против новото трудово законодавство, организиран од најголемите синдикати во јавниот и приватниот сектор – ΑΔΕΔΥ и Генералниот сојуз на работници (ΓΣΕΕ). Тогаш учествуваа и морнарите, транспортните и железничките работници, а во Атина се одржаа масовни демонстрации со барање за повлекување на пакетот мерки што го менуваат работното време.