Амбасадата на Руската Федерација во Црна Гора денеска оцени дека одлуката на Подгорица да воведе визи за руските граѓани од 1 ноември е доказ, како што е наведено, за „зависноста на надворешнополитичкиот курс на Црна Гора од странско влијание“.
Руската дипломатска мисија објави дека воведувањето на визниот режим негативно ќе влијае на односите меѓу Русија и Црна Гора, како и на одредени сектори на црногорската економија, особено туризмот.
Во соопштение објавено на Телеграм, Руската амбасада наведе дека одлуката е поврзана со исполнувањето на условите за пристапување на Црна Гора во Европската Унија и изрази незадоволство од потегот.
Амбасадата потсетува дека руските туристи минатата година учествувале со 16,4 проценти во сите ноќевања во Црна Гора, а туризмот сочинува околу 30 отсто од бруто-домашниот производ на земјата.
Москва проценува дека воведувањето на визен режим би можело значително да влијае на бројот на руски посетители.
„Мора да се претпостави дека оваа мерка веројатно нема да наиде на разбирање и поддршка кај Црногорците кои сакаат да развијат соработка со Русија. Амбасадата е убедена дека, со добра волја, прашањето за одржување на безвизен режим е сосема изводливо дури и ако земјата кандидат се приклучи на ЕУ. За жал, нема очигледен интерес од црногорската страна“, се нагласува во соопштението.
Руската амбасада изјави дека одлуката би можела да влијае и на проекти во кои се вклучени руски бизнисмени, кои, како што е наведено, се многу корисни за Црна Гора, и рече дека Москва останува подготвена да разгледа предлози за надминување на влошената состојба во билатералните односи.
„Го задржуваме правото на соодветен одговор на непријателските потези“, се вели во соопштението на амбасадата.
Црногорските власти објавија дека руските граѓани ќе бидат обврзани да добијат виза за влез во земјата од 1 ноември, а апликациите ќе можат да се поднесуваат во дипломатско-конзуларните претставништва на Црна Гора и во визните центри ВФС Глобал во Русија. Планирано е и воведување електронски визи.