Серија тешки сообраќајни несреќи и во Чешка: Возила се судирале во густа магла, пожарникари бегале да спасат жива глава (ВИДЕО)

Серија тешки сообраќајни несреќи се случија за кратко време на автопатот Д1 во Чешка, во близина на градот Вишков. На делницата наеднаш падна густа магла, а коловозот беше подмрзнат.

Пожарникарите кои во неделата наутро пристигнаа на лице место за да ги спасуваат луѓето од удрените возила, самите се најдоа во голема опасност.

Само неколку минути по првите судири, нови возила продолжуваа да налетаат во густата магла.

Драматичните снимки од овие моменти ги објави Чешката противпожарна служба. Според пожарникарите, само благодарение на среќни околности не дошло до уште потешки последици.

Во речиси исти услови – густа магла и намалена видливост – денеска се случи серија верижни несреќи и на автопатот „Тракија“ во Бугарија. Таму загинаа најмалку 12 лица, а околу 50 беа повредени. Поради трагедијата, во Бугарија утре е прогласен ден на жалост.