Силното невреме што во текот на ноќта и утрото го зафати Загреб предизвика значителен хаос низ хрватската престолнина. Ветровите со брзина до 120 километри на час соборија дрвја, однесоа делови од покриви, урнаа семафори и сериозно го нарушија сообраќајот во градот.
Пожарникарите беа преплавени со стотици повици од граѓани. Во многу делови од градот водата навлезе во станбени згради, а штети се регистрирани и на некои од препознатливите објекти. Еден од симболите на градот, кошаркарскиот центар „Дражен Петровиќ“, претрпе значителни оштетувања – силниот ветер го откорна дел од покривот.
Сообраќајот во Загреб е сериозно нарушен. Трамвајскиот и железничкиот сообраќај се прекинати или значително ограничени поради паднати дрвја и гранки на пругите. На некои раскрсници сообраќајот е практично запрен, а полицијата рачно го регулира движењето. Делови од автопатите А1 и А6 се затворени поради силен ветер и зимски услови.
Во повисоките делови на Загреб и околината, особено на Сљеме, ситуацијата доби речиси зимски карактер – избувна снежна бура, а некои жители останаа без електрична енергија и греење.
View this post on Instagram
Заменик-командантот на Загрепската противпожарна служба, Томислав Ресман, изјави дека од почетокот на невремето се евидентирани стотици интервенции, а дека се очекуваат уште стотици. Тој додаде дека силниот ветер значително ја отежнува работата на екипите.
Градските власти ја откажаа наставата во сите основни и средни училишта во Загреб и Загребската жупанија поради опасните временски услови. Граѓаните се повикани да останат дома освен ако не е апсолутно неопходно да излезат.
Метеоролозите предупредуваат дека силниот ветер може да продолжи во текот на целиот ден, а целосна стабилизација на временските услови не се очекува во скоро време.
Zagreb upravo, Selska 😕 pic.twitter.com/oGinzF8FZG
— Neverin (@neverinhr) March 26, 2026