Силното невреме што попладнево го зафати Скопје не го поштеди ниту Меѓународниот аеродром „Скопје“. Поројниот дожд предизвика поплава во дел од аеродромскиот терминал и во просториите низ кои се движат патниците.
На видеоснимки објавени на социјалните мрежи јасно се гледа како дождовницата навлегла во терминалот, при што водата се разлева по подот, а присутните патници се обидуваат да ги избегнат поплавените делови.
Поплавувањето на аеродромот се случува во време кога невремето предизвика сериозни проблеми низ целиот главен град – паднати дрвја, откорнати кровови, оштетени возила, прекини во електроснабдувањето и отежнат сообраќај на повеќе локации.
Засега нема официјални информации од управата на аеродромот дали поплавата предизвикала прекин или доцнење на летовите, како и дали е направена материјална штета во терминалот.