Финалето во Загреб и триумфот во Скопје му донесоа напредок на Калин Ивановски од 438 места на најновата АТП-листа по Вимблдон, на која македонскиот тениски репрезентативец се искачи на 710. место.
Лина Ѓорческа, пак, благодарејќи на историскиот успех во трите квалификациски кола и настапот како прв(а) од Македонија на главниот турнир на неофицијалното светско првенство во тенис, скокна 14 позиции на ВТА-листата, на која неделава е 208. Најдобрата македонска тенисерка попладнево го загуби маратонот од 2:46 часа против Дебора Киеза (354.) од Италија на стартот од челинџерот ВТА 125 во Рим.
Олег Приходко, кој на крајот на мај се префрли од украинската на македонската тениска листа, е највисоко рангиран тенисер од Македонија со 400. место на АТП-ранкингот, 28 места погоре од претходното рангирање, а на неа е и Обрад Марковски на 1910. место.