Сите услови се исполнети Бојан Миовски да го одигра првиот натпревар за Глазгов Ренџерс утре од 13 часот во најголемото шкотско дерби со Селтик на „Иброкс“, откако македонскиот напаѓач потпиша четиригодишен договор со „ренџерите“.
„Пресреќен сум што сум тука. Ова е голем клуб со неверојатна историја и почестен сум со можноста да бидам дел од него“, изјави повратникот во шкотскиот фудбал.
Репрезентативецот на Македонија, кој пред истекот на преодниот рок се спаси од голготата во Жирона, кадешто не ја доби шансата што ја заслужи како стрелец на 44 гола во 98 настапи за Абердин, навреме е регистриран за новиот клуб, чиј дрес првпат треба да го облече утре, и тоа како стартер!
За 26-годишниот штипјанец, кој видно расположен го одработи првиот тренинг со новиот тим, Глазгов Ренџерс наводно платил отштета од 3,5 милиони евра плус 3 милиони евра додатоци и клаузула за продажба од 20 отсто за Жирона.
Миовски ќе го носи дресот со број 28.