Руската Федерална служба за безбедност (ФСБ) објави дека спречила терористички напад насочен кон висок руски функционер, планиран на гробиштата „Троекуровски“ во Москва, каде што тој требало да ги посети гробовите на своите блиски роднини.
Според руските медиуми, целта бил секретарот на Советот за безбедност и поранешен министер за одбрана, Сергеј Шојгу, а акцијата била организирана од украинските специјални служби. Нападот требало да се изврши со експлозивна направа скриена во вазна со цвеќе, опремена со камера за далечинско активирање.
„Федералната служба за безбедност спречи терористички акт кога функционерот го посетил гробното место на блиски роднини на гробиштата Троекуровски“, се наведува во официјалното соопштение на ФСБ, без да го именува целта. Според извештаите, акцијата била закажана за 12 ноември, на годишнината од смртта на мајката на Шојгу, а ФСБ ја разоткрила на 14 ноември.
Во операцијата се уапсени тројца осомничени: руски брачен пар, осудени наркомани, и мигрант од Централна Азија. Украинските служби, според ФСБ, го регрутирале мигрантот, а преку апликациите WhatsApp и Signal комуницирале со нив. Меѓу приведените е Шамсо Џалолидин Курбанович (46), роден во 1979 година во Киев, баран во Русија за убиство и нелегална трговија со оружје.
Од запленетите уреди пронајдени се преписки со украински офицер, како и камерата за надзор во вазната, опремена со далечински управувач за детонација на експлозивот. ФСБ предупреди дека украинскиот режим, под влијание на западните служби, подготвува слични напади во други региони на Русија
