Иранската револуционерна гарда се закани дека ќе нападне американски објекти на Блискиот Исток доколку нејзините танкери бидат загрозени, објавија иранските државни медиуми.
Предупредувањето доаѓа додека Вашингтон чека одговор од Техеран на најновиот предлог за мировен договор.
„Секој напад врз ирански танкери и трговски бродови ќе резултира со силен удар врз американските објекти во регионот и непријателските бродови“, соопштија од Гардата, еден ден откако американските сили наводно нападнаа два ирански танкери во Оманскиот Залив, пренесува Гардијан.
Претседателот на САД, Доналд Трамп, во петокот изјави дека очекува ирански одговор на најновиот предлог за мировен договор на Вашингтон. Сепак, немаше јавна потврда дека Техеран испратил одговор преку пакистански посредници, а иранскиот министер за надворешни работи, Абас Арагчи, изрази сомнежи за веродостојноста на американското раководство.
„Неодамнешната ескалација на тензиите поттикнати од американските сили во Персискиот Залив и нивните бројни прекршувања на прекинот на огнот фрлаат сомнеж врз мотивите и сериозноста на американската страна кога станува збор за дипломатија“, рече Арагчи во разговор со својот турски колега, според иранската новинска агенција ИСНА.
Во петокот, американски борбен авион нападна и онеспособи два танкери под иранско знаме, кои Вашингтон ги обвини дека ја прекршуваат американската блокада на иранските пристаништа.
Ирански воен претставник изјави за локалните медиуми дека морнарицата возвратила. Инцидентот следеше по ескалацијата претходната ноќ во Ормутскиот теснец, клучна меѓународна бродска линија што Иран се стреми да ја контролира за патарини и економско влијание.
САД велат дека контролата на Техеран врз виталниот нафтен пат е неприфатлива.
Вашингтон му испрати на Иран, преку пакистански посредници, предлог за продолжување на прекинот на огнот во Заливот за да се овозможат разговори за конечно решение на конфликтот што започна пред 10 недели со нападите на САД и Израел врз Иран.
Претседателот Доналд Трамп предупреди дека САД би можеле да продолжат со бомбардирањето на Иран доколку преговорите не успеат, вклучително и можни напади врз енергетската инфраструктура и извозните центри.