Американскиот државен секретар Марко Рубио остро ги критикуваше Шпанија и дел од другите сојузници во НАТО поради ограничената поддршка во војната против Иран, сугерирајќи дека Вашингтон по завршувањето на конфликтот можеби ќе ја преоцени својата улога во Алијансата.
Рубио изјави дека САД утврдиле дека Шпанија, како членка на НАТО која Вашингтон е обврзан да ја брани, го одбила американското користење на нејзиниот воздушен простор и јавно се фалела со тоа. Тој додаде дека Вашингтон се соочил со отпор и при обидите за користење на воените бази во Шпанија и на други места во Европа.
„НАТО е корисен за САД затоа што овозможува војниците и опремата да бидат стационирани во странство“, рече Рубио, но веднаш додаде:
„Но, ако НАТО се сведува само на тоа ние да ја браниме Европа ако биде нападната, а потоа тие да ни ги ускратуваат правата на базите кога ни се потребни, тоа не е многу добар аранжман.“
Тој нагласи дека таквиот однос тешко може да се смета за добар за Соединетите Американски Држави и дека „сето тоа ќе мора да се преиспита“.
„НАТО не може да биде еднонасочна улица. Да се надеваме дека ќе можеме да го поправиме тоа. Ќе имаме време да се позанимаваме со тоа подоцна“, заклучи американскиот државен секретар.
Шпанија неодамна го затвори својот воздушен простор за летови поврзани со војната во Иран, а претходно им забрани на САД да ги користат базите Рота и Морон во Андалузија за воени операции. Овие објекти долго време се под заедничка управа на Шпанија и Соединетите Американски Држави.
Американскиот претседател Доналд Трамп постојано ги критикуваше сојузниците во НАТО за она што тој го оценува како недоволна поддршка во конфликтот. Членот 5 од Договорот за колективна одбрана на НАТО не се применува на војната што ја започнаа САД и Израел против Иран.