Еден од најголемите умови на човештвото, Никола Тесла, почина сам на Божиќ, 7 јануари 1943 година, во Њујорк, каде што живееше речиси шест децении. Неколку дена подоцна, на 10 јануари, во катедралата „Свети Јован Богослов“ се одржа комеморација на која присуствуваа околу 2.000 луѓе.
Според биографот Марк Сајфер, веста за Теслината смрт била тажна дури и за првата дама на САД, Елеонор Рузвелт. Комеморацијата ја водеше градоначалникот на Њујорк, Фиорело Ла Гвардија, кој ја прочита посмртната беседа напишана од словенечкиот писател Луј Адамич.
На собирот присуствуваа бројни научници и добитници на Нобелова награда, а ковчегот на Тесла го носеа познати личности, меѓу кои и пронаоѓачот на FM радиото, Едвин Армстронг. Сајфер истакнува дека Тесла можел да стане најбогатиот човек во Америка, но наместо тоа се посвети на напредокот на човештвото.
Во последните десет години од животот, Тесла живееше во хотелот „Њујоркер“ и во тој период разговараше со високи американски и британски функционери за можности за завршување на Втората светска војна.
Тесла остави зад себе над 700 патенти, од кои повеќе од 300 се заштитени во 27 земји на пет континенти. Неговите достигнувања денес се изложени во престижни институции како Смитсонијан во Вашингтон и Куќата на славните пронаоѓачи во Акрон, Охајо.
Комеморацијата во 1943 година беше достојна почeст за генијот чии идеи ги поставија темелите на модерната електротехника и технологија.