Претседателката Гордана Сиљановска-Давкова присуствувала на одбележувањето на 30 годишнината од воспоставувањето на дипломатските односи со Соединетите Американски Држави, што се одржа во Њујорк.
Сиљановска-Давкова на настанот порачала дека посакува и во следните 30 години да го продолжиме стратешкото партнерство со САД, бидејќи живееме во турбулентни времиња во коишто е неопходна меѓусебна поддршка на глобален план.
Обраќајќи им се на претставниците од македонската дијаспора, таа оддаде почит за нивните успеси и им посака да останат сплотени и обединети. Претседателката изрази уверување дека заедно можеме да работиме на подобрување на животот во татковината, се вели во соопштението од нејзиниот кабинет.
„Должни сме кон вас. Јас ветувам дека ќе сторам сѐ да ги интензивираме контактите и тогаш кога сме одвоени“, изјавила Сиљановска Давкова, додавајќи дека час поскоро ќе го формира Советот за дијаспора преку којшто континуирано ќе се регулираат односите.
На настанот присуствувале претставници на американските владини институции, македонски дипломати во САД, како и претставници на македонската заедница.
