НАТО интензивно работи на зајакнување на одбраната на шведскиот остров Готланд во Балтичкото Море, кој се смета за една од најважните и најранливи стратешки точки на Алијансата во однос на Русија, објави „Политико“.
Островот Готланд, кој се наоѓа на само околу 300 километри од руската енклава Калининград, има клучна позиција за контрола на Балтичкото Море. Поради зголемените стравувања од руска агресија и хибридни напади, Шведска и НАТО повторно го претвораат островот во силно воено упориште.
Оваа недела Шведска ја заврши првата голема НАТО-вежба на Готланд по приклучувањето во Алијансата во 2024 година. Во вежбата учествуваа околу 18.000 војници од 13 земји, кои увежбуваа одбрана од можен руски напад.
Шведскиот командант за одбрана, генералот Михаел Клесон, предупреди дека руски напад „може да се случи во секој момент“, укажувајќи на зголемените руски воени активности, саботажи, дронски инциденти и шпионски операции во регионот.
Готланд често се нарекува „непотоплив носач на авиони“ поради неговата стратешка важност во воздушните и поморските операции. Шведска веќе инвестирала над 200 милиони евра за модернизација на воената инфраструктура, обновување на противвоздушната одбрана и распоредување тенкови и оклопни возила на островот. Во наредната година се планира дополнително зголемување на военото присуство.
Вежбата, исто така, покажа колку беспилотните летала го менуваат модерното војување – украински единици успешно симулирале уништување на шведски оклопни сили со употреба на дронови.