Високи американски одбранбени претставници разговараа за производство на оружје и други воени резерви со раководители од компании, вклучувајќи ги „Џенерал моторс“ и „Форд мотор“, објави вчера „Волстрит џурнал“ (WSJ), повикувајќи се на луѓе запознаени со дискусиите.
Прелиминарните разговори, кои започнаа пред војната со Иран, доаѓаат во време кога администрацијата на Трамп сака производителите на автомобили и другите американски компании да играат поголема улога во производството на оружје, објави WSJ.
Пентагон прашува дали индустријата може брзо да се префрли на производство на оружје
Функционери на Пентагон изјавија за весникот дека американските производители можеби ќе бидат потребни за поддршка на традиционалните добавувачи на оружје и прашаа дали компаниите би можеле брзо да се префрлат на работа во одбраната.
„GE Aerospace“ и производителот на возила и машини „Ошкош“ беа исто така меѓу компаниите вклучени во разговорите со одбранбените претставници, додаде WSJ.
Ројтерс не можеше веднаш да го потврди извештајот. Пентагон, „Џенерал моторс“, „Форд“, „GE Aerospace“ и „Ошкош“ не одговорија веднаш на барањата на „Ројтерс“ за коментар надвор од вообичаеното работно време.
Претставник на Пентагон изјави за WSJ дека Министерството за војна е „посветено на брзо проширување на одбранбената индустриска база со искористување на сите достапни комерцијални решенија и технологии за да се обезбеди нашите војници да одржат одлучувачка предност“.
Од инвазијата на Русија на Украина во 2022 година и воените операции на Израел во Газа, САД ги намалија своите залихи од оружје во вредност од милијарди долари, вклучувајќи артилериски системи, муниција и противтенковски ракети.