Рускиот претседател Владимир Путин, во интервју за индиското издание „Индија тудеј“, го оцени како „многу корисен“ состанокот во Кремљ со специјалниот претставник на САД, Стивен Виткоф, и Џаред Кушнер, зет на американскиот претседател Доналд Трамп. Оваа средба, што траела околу пет часа, се однесувала на предлозите за решавање на конфликтот во Украина.
Путин истакна дека американските предлози се базираат на договорите од претходниот самит меѓу претседателите на САД и Русија на Алјаска. Американската страна го поделила 28-точниот план на Трамп во четири пакети, предлагајќи дискусија по одделни теми. Тој нагласи дека постигнувањето консензус е „тешка задача“, бидејќи морал секоја точка да ја разгледа детално, а имало и предлози со кои Москва не се согласила, околу кои се воделе разговори.
Во врска со ситуацијата во Украина, Путин повтори дека жителите на регионите Донецк и Луганск не сакаат да останат во составот на земјата, што го изразиле на референдум. Тој потсети дека Русија ѝ предложила на Украина да ги повлече трупите од Донбас и да не започнува воени операции, но Киев одлучил да влезе во војна.
„Русија ќе ги ослободи Донбас и Новорусија во секој случај, со воени или други средства“, изјави Путин, додавајќи дека Москва се обидува да изгради односи меѓу ДНР и ЛНР со Украина, но Киев не ги признава овие региони.
Интервјото е дадено пред две-дневната посета на Путин на Индија, а американската делегација по средбата во Москва ќе се сретне со украинската страна во Флорида.