Заканата на рускиот претседател Владимир Путин за одмазда против Украина поради минатонеделниот напад со беспилотни летала сè уште не е целосно реализирана и дека веројатно ќе следи значаен, повеќеслоен напад, изјавија американски претставници за Ројтерс.
Точниот момент на целосната руска реакција е непознат; еден извор вели дека се очекува во наредните денови. Друг американски претставник рече дека одмаздата може да вклучува различни видови воздушни капацитети, вклучувајќи ракети и беспилотни летала.
Службениците, кои зборуваа под услов на анонимност, не ги открија очекуваните руски цели ниту пак навлегоа во детали за разузнавачките информации. Првиот претставник рече дека нападот на Москва ќе биде „асиметричен“, што значи дека пристапот и целите нема да бидат исти како украинскиот напад врз руските воени авиони минатиот викенд.
Русија започна масовен напад со ракети и беспилотни летала врз украинскиот главен град Киев во петокот, а руското Министерство за одбрана изјави дека нападот бил насочен кон воени и воено поврзани цели како одговор на она што го нарече украински „терористички акти“ против Русија. Но, американски претставници велат дека целосната руска одмазда допрва треба – да дојде.
Западен дипломатски извор изјави дека рускиот одговор можеби веќе започнал, но може да ескалира во напади врз симболични украински цели, како што се владини згради, за да се испрати јасна порака до Киев. Друг висок западен дипломат очекува уште еден разорен напад од Москва: „Ќе биде масивен, жесток и немилосрден. Но, Украинците се храбри луѓе“.
Мајкл Кофман, експерт за Русија, верува дека Москва би можела да се обиде да ја казни безбедносната служба на Украина СБУ за нејзината улога во нападот, потенцијално користејќи балистички ракети со среден дострел, и дека украинските центри за производство на одбраната исто така би можеле да бидат цел. Сепак, Кофман истакнува дека опциите на Русија за голема ескалација се ограничени бидејќи веќе инвестира голем дел од својата воена моќ во Украина.
Киев тврди дека во нападот во неделата, со кодно име „Пајажина“, биле користени 117 беспилотни летала лансирани од длабоко во руска територија. САД проценуваат дека биле погодени до 20 воени авиони, од кои околу 10 биле уништени, додека руската влада негира дека уништила било каков авион, но руските воени блогери известуваат за загуби или сериозни штети на околу десетина авиони, вклучувајќи ги и оние способни да носат нуклеарно оружје.
Путин рече во телефонски разговор со Доналд Трамп дека Москва ќе мора да одговори на нападот, а Трамп подоцна им рече на новинарите: „Веројатно нема да биде убаво.