Кирил Буданов, шефот на кабинетот на украинскиот претседател Володимир Зеленски, изјави дека основната идеологија на Русија никогаш не се променила, поради што, како што наведе, Украина мора да создаде услови под кои Русија „ќе исчезне како империја“.
„Промената на режимот во Русија не ја промени нејзината суштина. Без оглед на нејзиното сегашно име, нејзината основна идеологија не се промени“, нагласи Буданов во интервју за независниот арапски портал „Ал-Модон“.
Тој посочи на фактот дека руската влада, ниту во царската ера, ниту во советската ера, ниту сега, не си поставила цел да ги подобри условите за живот на своите граѓани.
„Општо земено, политиката на сегашниот руски претседател не се разликува значително од политиката од царската или советската ера. Исто така, не треба да очекуваме дека Русија повторно ќе се промени поради внатрешни фактори. Треба да создадеме услови под кои Русија ќе исчезне како империја“, рече Буданов.
На територијата на Русија, додаде тој, треба да се основаат неколку регионални држави, од кои секоја ќе се грижи за благосостојбата на својот народ.
„Само тогаш Украина, Европа и целиот свет ќе се чувствуваат побезбедно“, заклучи Буданов.
Шефот на кабинетот на Зеленски претходно во интервју за британскиот новинар Пирс Морган изјави дека украинскиот претседател не верува дека ситуацијата ќе се промени ако неговиот рускиот колега Владимир Путин биде отстранет, бидејќи, како што изјави, „коренот на проблемот лежи не само во личноста на диктаторот, туку и во системот на владеење што тој го изградил, кој може да создаде ‘нов Путин’ дури и по отстранувањето на сегашниот шеф на Кремљ“.