Руското Министерство за одбрана издаде соопштение по повод инцидентот со навлегувањето на руски беспилотни летала во полскиот воздушен простор, за што претходно алармираа властите во Варшава. Според министерството, нападот бил насочен исклучиво кон однапред одредени цели, а Полска не била дел од нив.
„Целите на нападот се успешно остварени. Сите планирани цели беа погодени. Ниту една цел на територијата на Полска не беше предвидена како мета“, се наведува во официјалното соопштение.
Оттаму дополнуваат дека беспилотните летала користени во операцијата имаат дострел ограничен на 700 километри, што, според нив, укажува дека навлегувањето во полскиот воздушен простор не било намера. Сепак, руското Министерство за одбрана изрази подготвеност за дијалог, велејќи:
„Подготвени сме да одржиме консултации со полското Министерство за одбрана за да се разјасни ова прашање“.
Кремљ, од своја страна, одби да даде детален коментар за инцидентот, нагласувајќи дека ова е прашање што треба да го адресираат одбранбените функционери. Портпаролот на Кремљ рече дека Министерството за одбрана е надлежно да ги разгледа и коментира деталите поврзани со овој случај.
Инцидентот предизвика силна реакција во Полска, каде властите потврдија дека собориле неколку дронови, а остатоци од еден веќе се пронајдени. Полска го активираше член 4 од договорот на НАТО за консултации, а во операцијата за заштита на воздушниот простор учествуваа полски Ф-16, холандски Ф-35 и италијански АВАКС авиони.