Севернокорејска ракетна единица е веќе стационирана во западна Русија и се подготвува да употреби 120 балистички ракети и шест лансери за нови напади врз Украина, изјави претставник на украинската воена разузнавачка служба.
Русија се обидува да го искористи акутниот недостиг од висококвалитетни системи за воздушна одбрана во Украина, погодувајќи ја со балистички ракети кои се исклучително тешки за соборување, објави „Њујорк пост“.
Андриј Черњак од Главната разузнавачка дирекција на Украина објави дека Русија планира да стационира ракетна единица од околу 90 севернокорејски војници во регионот Воронеж. Таа ќе биде доделена на руската 112. ракетна бригада.
Пјонгјанг веќе испрати нова пратка од 40 ракети КН-23 и КН-24, заедно со оперативен персонал. Точната конфигурација на распоредувањето и вкупниот број на ракети ќе бидат финализирани на разговори на високо ниво следниот месец. Русија очекува распоредувањето да вклучува вкупно 120 балистички ракети и шест лансери.
„Балистичката ракетна одбрана е една од најголемите ранливи точки на Украина, па секое зголемување на нивниот број ќе претставува уште поголем предизвик“, изјави Роб Ли, виш соработник во Институтот за надворешна политика со седиште во Филаделфија.
Распоредувањето се совпаѓа со првите два ракетни напади од севернокорејско оружје врз Украина од август. Минатата недела, украинските власти објавија дека севернокорејска ракета срамнила со земја куќа во селото Радушное, при што загинале најмалку пет члена на едно семејство.
Ракетите КН-23 и КН-24 имаат поголем дострел и поголем товар од нивниот руски пандан „Искандер“, но се многу помалку прецизни и се поврзани со напади со огромен број цивилни жртви. Запирањето на ваквите ракети е можно само со американските системи „Патриот“.
Северна Кореја стана близок сојузник на Москва од почетокот на целосната инвазија во 2022 година, а во 2024 година двете земји потпишаа договор за меѓусебна одбрана. Пјонгјанг веќе испорача милиони артилериски гранати и испрати 14.000 војници во регионот Курск за да ја одвратат украинската копнена инвазија во 2024 година.
Во моментов, околу 9.500 севернокорејски војници остануваат во регионот Курск, привремено не учествувајќи директно во борбените операции. Сепак, претседателот Володимир Зеленски предупреди дека Кремљ подготвува база во Воронеж за да прими уште 30.000 севернокорејски војници.