Известувачот за Македонија во Европскиот парламент, вели дека е задоволен од содржината и пораките во Извештајот за напрадокот на Македонија кој беше изгласан минатата недела во Европскиот парламент, но изрази загриженост од нападите и реакциите што ги добил, особено од бугарски националистички кругови.
Во интервју за Канал 5, Томас Вајц, изјави дека бил изложен на координирана кампања на оцрнување и добива сериозни закани, вклучително и смртни, поради неговата улога во подготовката на извештајот.
„Да, бев под силен напад, тоа беше цела кампања на оцрнување против мене. Ме нарекуваа пристрасен, ме обвинуваа дека сум имал повеќе контакти со Македонија отколку со Бугарија, па дури и дека сум корумпиран“, вели Вајц.
Најзагрижувачки, според него, е тоа што неговиот приватен телефонски број бил споделуван во екстремно десничарски групи на Телеграм, што довело до директни закани по неговиот живот.
„Добив смртни закани и други закани. Ова продолжува и по гласањето. За жал, ситуацијата ескалираше во Бугарија“, нагласува Вајц.