Иран соопшти дека Ормускиот теснец е повторно целосно отворен за сите трговски бродови, додека американскиот претседател Доналд Трамп истовремено потврди дека поморската блокада на иранските пристаништа останува во сила сè додека не се финализира конечниот договор меѓу двете земји.
Во објава на платформата Truth Social, Трамп ја поздрави одлуката на Техеран, оценувајќи ја како позитивен чекор кон нормализирање на поморскиот сообраќај во регионот.
„Ормускиот теснец е целосно отворен и подготвен за нормален сообраќај, но поморската блокада на иранските пристаништа останува на сила додека нашиот договор со Иран не биде целосно завршен. Тој процес треба да оди многу брзо, бидејќи повеќето точки веќе се договорени“, напиша Трамп.
Претходно, иранскиот министер за надворешни работи Абас Арагчи изјави дека преминот низ Ормускиот теснец е „целосно отворен“ за сите трговски бродови во текот на преостанатиот период од примирјето во Либан. Според неговите зборови, пловидбата ќе се одвива по координирана рута, како што претходно објави Организацијата за пристаништа и поморство на Иран.
Сепак, останува нејасно дали иранската одлука ќе има директно влијание врз американската поморска блокада, која според Трамп засега продолжува да важи.
Овие случувања доаѓаат во момент кога меѓународната заедница интензивно се обидува да обезбеди стабилност и слобода на пловидба низ стратешкиот Ормуски теснец. Британскиот премиер Кир Стармер и францускиот претседател Емануел Макрон најавија виртуелен состанок со учество на околу 40 светски лидери, на кој главна тема ќе биде безбедноста на бродовите во регионот.