Американскиот претседател Доналд Трамп објави на својата социјална мрежа Трут соушал дека разговарал со рускиот претседател Владимир Путин, неколку часа пред средбата со Зеленски што е закажана за денеска во Мар-а Лаго на Флорида.
- „Тукушто имав добар и многу продуктивен телефонски разговор со претседателот Путин на Русија“, објави Трамп и додаде дека средбата со Зеленски ќе се одржи во главната трпезарија на Мар-а-Лаго и дека новинарите се поканети да присуствуваат.
Кремљ, исто така, потврди дека се одржал разговорот меѓу двајцата лидери. Одделно, во претходна објава, Трамп ја фали улогата на неговата администрација како глобален миротворец, осврнувајќи се на новодоговореното примирје меѓу Камбоџа и Тајланд, и сугерирајќи дека Обединетите Нации биле од „мала помош“ во решавањето на конфликтите, вклучително и Украина.
- „Можеби Соединетите Американски Држави стануваат вистинските Обединети нации“, напиша Трамп, сугерирајќи дека Вашингтон презема сè поцентрална улога во меѓународната дипломатија.
Средбата со Зеленски се одвива во чувствителен момент, додека на терен продолжуваат борбите и меѓусебните обвинувања меѓу Киев и Москва, а дипломатските сигнали од Вашингтон внимателно се следат и во Европа и пошироко.