Класифицирана анализа на американските разузнавачки податоци, која тукушто пристигна во Белата куќа, фрли сенка врз оптимизмот на претседателот Доналд Трамп во врска со крајот на војната со Иран.
Како што дознава „Вашингтон пост“, ЦИА заклучи дека Иран може да ја преживее американската поморска блокада најмалку три до четири месеци пред да претрпи вистински економски колапс.
Оваа проценка на разузнавачите, чии тајни извештаи за Иран редовно се многу потрезвени и потемни од јавното фалење на Трамп и на неговите луѓе, исто така открива дека Техеран сè уште има сериозен арсенал од балистички ракети и беспилотни летала, и покрај неделите брутално американско и израелско бомбардирање.
Бројките се немилосрдни. Додека Трамп јавно вели во Овалната соба дека арсеналот на Иран е „збришан од лицето на земјата“ и дека им останале едвај 18 или 19 проценти од нивното оружје, разузнавачките службеници на терен гледаат поинаква слика. Иран, според разузнавачки извори, успеал да зачува околу 75 проценти од своите мобилни лансери и дури 70 проценти од своите ракетни резерви од предвоениот период.
Режимот, се вели во анализата, успеал да ги реактивира речиси сите свои подземни складишта, да поправи некои од оштетените ракети, па дури и да состави нови кои беа при крај кога започнаа првите напади.
Официјално, администрацијата сè уште промовира наратив за тотална доминација. Висок разузнавачки службеник, кој зборуваше под услов да остане анонимен, вели дека блокадата на Трамп „сее вистински хаос“ и предизвикува штета што се зголемува од ден на ден. Тој вели дека иранската војска е деградирана, нејзината морнарица уништена, а неговите лидери се кријат во дупки.
„Она што останува е гладот на режимот за страдање на цивилите – изгладнување на сопствениот народ за да се продолжи војната што веќе ја изгубиле“, вели тој.
„Ситуацијата не е ни приближно толку лоша како што некои велат“, вели извор за весникот.
Разузнавачките служби стравуваат дека Иран би можел да почне да шверцува нафта по железница низ Централна Азија. Иако тоа нема да ги замени морските патишта, би можело да му обезбеди на режимот доволно воздух за да преживее со месеци.
Во однос на оружјето, Иран сè уште има импозантен арсенал – пред војната имаше 2.500 ракети и илјадници камикази беспилотни летала.
Истрагата на „Вашингтон пост“ откри дека иранските напади врз американските бази во регионот предизвикале многу поголема штета отколку што Вашингтон некогаш признал. Најмалку 228 објекти и опрема биле погодени, ниво на уништување кое систематски се прикривало.