Жител на Кратово преку редакцијата на expres.mk се понуди да усвои и згрижи 30 крави од стадото кое со години слободно се движи низ Крива Паланка и околината, создавајќи сериозни проблеми на локалното население.
Понудата доаѓа во време кога бројот на неконтролираните говеда во кривопаланечко се проценува на над 1.000, а локалните власти и граѓаните со месеци бараат системско решение. Кравите уништуваат ниви, градини и овоштарници, влегуваат во дворови, блокираат улици и создаваат ризик за безбедноста и водоснабдувањето.
„Имам услови – штала, пасишта и можност да ги чувам правилно. Ако институциите дозволат, готов сум да земам околу 30 животни и да им обезбедам соодветна грижа. Така барем малку ќе се намали товарот врз граѓаните на Крива Паланка“, изјави кратовецот кој сакаше да остане анонимен.
Проблемот со кравите во Крива Паланка трае повеќе од една деценија. Од околу 400–570 грла пред неколку години, бројот порасна на над илјада. Агенцијата за храна и ветеринарство донесе решенија за одземање, но досега се заловени само околу 80–100 животни. Градоначалникот Сашко Митовски засега не може да го реши проблемот во неговиот град.
Понудата на кратовецот со иницијали Д.П. се појавува како една од ретките конкретни приватни иницијативи. Дали ќе биде прифатена ќе зависи од надлежните институции – Агенцијата за храна и ветеринарство и општинските власти – кои треба да проверат здравствената состојба на животните и условите за чување.
Додека државата бара трајно решение, ваквите индивидуални понуди покажуваат дека има граѓани подготвени да помогнат. Дали ќе се искористи оваа можност останува да се види.