На граничните премини „Табановце“ и „Богородица“ се забележани гужви, со време на чекање до 30 минути за влез на „Табановце“ и околу 20 минути за излез на „Богородица“. На другите гранични премини сообраќајот се одвива без подолги задржувања, соопштуваат од АМСМ.
Регионалниот пат Македонски Брод – Скопје останува затворен поради големиот пожар во Националниот парк „Јасен“. Според АМСМ, сообраќајот на државните патишта генерално тече непречено, по суви коловози, но со зголемен интензитет надвор од градските средини поради летната сезона и патувањата за одмор.
АМСМ ги советува возачите да ја прилагодат брзината на условите на патот, да ја почитуваат сообраќајната сигнализација и да возат внимателно, особено на делниците низ котлините, речните долини и клисурите каде постои ризик од одрони. Ова особено се однесува на патните правци Катланово – Велес, Маврово – Дебар – Струга, Виница – Берово и Кочани – Делчево.