Полскиот министер за надворешни работи Радослав Сикорски ја предупреди Русија дека не треба да се жали во Обединетите нации ако нејзините ракети или авиони бидат соборени откако влегле во воздушниот простор на НАТО, изјави тој вчера во Њујорк на вонредниот состанок на Советот за безбедност на ОН.
Состанокот беше свикан по инцидентот на 19 септември, кога три руски воени авиони влегоа во естонскиот воздушен простор на 12 минути, пред да бидат пресретнати и вратени од италијански F-35 авиони во рамките на НАТО мисијата. Оваа инкузија се случи по претходните случаи овој месец, кога руски беспилотни летала завршија во Полска и Романија, што ги стави сојузниците на НАТО во состојба на висока готовност.
– Имам само едно барање до руската влада: Ако друга ракета или авион влезе во нашиот воздушен простор без дозвола, намерно или по грешка, и биде соборен, а остатоците паднат на територијата на НАТО, ве молам не доаѓајте тука и не се жалете за тоа. Предупредени сте – нагласи Сикорски, обраќајќи се директно кон Москва.
Полскиот премиер Доналд Туск, во паралелен коментар, потврди дека Варшава ќе собива непријателски објекти што го прекршуваат полскиот воздушен простор, без одлагање. Британската министерка за надворешни работи Ивјет Купер се приклучи на предупредувањето, велејќи дека Лондон е подготвен да ги соочи руските авиони што го прекршуваат НАТО воздушниот простор. Овие изјави ја истакнуваат зголемената тензија во регионот, каде НАТО бара посилна одбрана на источниот фланг, вклучително и интегрирање на системи како Патриот од Германија.