Лидерот на Демократската унија за интеграција Али Ахмети повторно ја „облече“ униформата на „врховен командант“ на УЧК од 2001 година и истапува со таква иконографија. Вчера на митингот на нивната опозициска алијанса Национална алијанса за интеграција присутните можеа да го видат Али Ахмети во две изданија: едниот во цивилна облека како им упатува предизборни пораки, а на „другиот Али Ахмети“, „облечен“ во воена униформа на некогашен „врховен командант на УЧК“ ги потсетуваше дрон, кој го надлетуваше во тие мигови градскиот плоштад во Тетово, каде што се одржуваше митингот. „Орлите летаат високо во синото небо!“ – беше напишано на транспарентот, кој го носеше дронот со „командантската фотографија“ на Ахмети.
„Симболичен момент се случи за време на митингoт на Националната алијанса за интеграција (АКИ), што се одржа синоќа во Тетово. Додека Али Ахмети го држеше својот говор дрон со албански национални знамиња и симбол на двоглав орел леташе на небото над градот.“ – објави, покрај другото, информативниот портал на албански јазик „Тетова сот“. На митингот во Тетово во предниот ред се наоѓаа другите челници на Националната алијанса за интеграција на ДУИ, меѓу нив и нивниот кандидат за градоначалник на Тетово Бајрам Реџепи, покрај голем транспарент со напишан текст „УЧК“.
По митингот преку својот фејсбук-профил Али Ахмети соопшти дека ќе учествува денес во Тирана на протестот, кој ќе се одржи на плоштадот „Скенддербег“ во знак на „поддршка на поранешните водачи на УЧК на Косово“, кои се во притвор во Хаг. На фејсбук Ахмети напиша: „Правда за ослободителите„ Сите сме УЧК!“. Упатена е и втора порака „Сите патишта водат кон Тирана – во одбрана на УЧК“ во неговата објава преку општествената мрежа, придружена со видео-снимка од марширање на вооружени поранешни припадници на поранешната косовска УЧК од времињата на нејзиното дејствување.
Телевизијата „Визион Плус“ од Албанија денеска објави: „Протестот во Тирана е под мотото ‘Слободата има име, правда за ослободителите’. На собирот ќе учествуваат граѓани од сите албански територии, претставници на граѓанското општество и познати политички личности од Албанија, Косово, С.Македонија и пошироко. Околу 60 автобуси со граѓани се очекува да пристигнат од Косово. Овој протест е трет по ред по оние, што се одржаа во Приштина и Хаг во близина на Специјалниот суд. Во Хаг од 3 април 2023 година процесот се одвива против поранешните водачи на УЧК Хашим Тачи, Кадри Весели, Јакуп Красниќи и Реџеп Селими, кои ги негираа сите обвинувања за воени злосторства и злосторства против човештвото.“